大家都知前幾日我過新會飮飮食食，除咗品嘗到又靚又正嘅水蟹之外，仲有幸見識新會另一樣馳名美食“古井燒鵝”。古井燒鵝係由馬崗鵝同烏鬃鵝配種而成，大約養三、四個月，重約七斤，唔算大隻，但保證肉質嫩滑。
講起新會嘅燒鵝，其中*出名嘅當然就係百年老店“恆益”出品嘅古井燒鵝喇。聽講佢哋平均每日賣六百隻鵝，今次我就有幸參觀埋恆益嘅工場，實在大開眼界。恆益嘅燒鵝係用荔枝柴嚟燒，所以香味同一般燒鵝唔同。佢哋嘅燒鵝皮唔似香港食到嘅咁紅潤，原來係力求原汁原味，唔添加色素。古井燒鵝嘅蘸醬唔係我哋平時食燒鵝配嘅酸梅醬，而係用燒鵝過程中鵝身流出來嘅汁液另外加工製成獨門蘸醬。
講開又講，食古井燒鵝唔單只食鵝肉，內臟部分例如鵝肚、粉腸同鵝肝都非常好味，喺香港就冇乜機會食到喇。今次我試食咗豉椒炒鵝肚，鵝肚切成五文銀大細，細細粒，炒嚟食十分爽口冶味。粉腸就齋用白灼，但都十分甘香，鵝肝絕對原裝大細，直接燒嚟食好香滑。呢幾味小菜用來送酒送飯實在冇得彈。當然啦，動物內臟啲膽固醇含量較高，好食都係適量就好。查實恆益嘅古井燒鵝差唔多兩百文人仔一隻，唔算好貴，間中嚟食返次都唔錯。
